Accueil > Storia > 1768 : a Battaglia di u Borgu

1768 : a Battaglia di u Borgu

17 juillet 2012

da Ghjuvanfilippu Antolini

 

Quellu famosu mese d’uttobre 1768 s’hè firmatu impressu per u sempre inde a memoria viva di tutti i Corsi. È difatti fù tandu chì l’armata regulare di a Còrsica indipendente è dimucràtica messe in dirotta l’armata più grande di u mondu, vale à dì quella di u Rè di Francia, Rè dettu di dirittu divinu u quale di e parolle ‘suffraghju universale’, ‘distaccu di puteri’ o ancu ‘dimucrazia’ ùn ne cunniscia un’acca di u sensu.

In sèguitu di l’odiosu trattatu di Versaglia {chì – è ci vole à dilla- ùn hè mancu appena un cuntrattu di vendita ma à u cuntrariu una spezia di compra da u Rè di Francia d’un dirittu internaziunale d’inframessa inde l’affari corsi } e truppe francese pòsenu in opera a so cunquista militaresca di Cursichella. È fù cusì chì u 29 d’aostu 1768 si sbarcò in San Fiurenzu, cù u scopu fissu di rendesi patrone ind’un amme di tutta a Còrsica, u cusì dettu Claude François, marchese di Chauvelin.

Tandu affinch’ellu l’apprufittessi à bella megliu u cuntestu decise ellu di movesi in duie direzzione, vale à dì chì Grandmaison chì ghjunghjìa da u Nebbiu stabilì u so campamentu nantu à l’altupianu di San Niculaiu invece chì Marbeuf, caminendu pè a piaghja urientale, s’impatrunì senza ostàculu maiò di Furiani, Biguglia, Lucciana, Vignale è u Borgu poi entrì in Casinca per vìa di i partisgiani di quellu vittulu di Buttafoco rallegatu à i Francesi. Ma da suttile strategu ch’ellu fù tandu, sapendu bellu bè chè per tene sti lochi furtificati i francesi sarèbbenu custretti à spezzà e so forze , Pasquale Pàoli i lasciò andà in avanti pè pigliàssine pussessu unu ad unu persuasi ch’elli eranu forse chè i paisani corsi ùn averèbbenu mai u spirdu d’azzuffalli.

 

À listessu mumentu sottu cumandu di Pasquale Pàoli, e truppe corse stavanu in Muratu, locu quantu stratègicu dund’ellu pudia surveglià tutte e strade rechendusi in Balagna, in Casinca è dinù versu Corti è i so cuntorni.

Tandu nantu à l’altapianu di San Niculaiu, Pàoli affiancatu da parechji millai d’omi assaltò cù forza e truppe francese di Grandmaison chì di pettu à un’assaltu sìmile arritronu in òrdine sparsu versu Oletta, assaliti sin’à l’ùltimu da i naziunali corsi. Accurgendusi di ch’ella sarebbe quant’à purtà impiastru per a puntura di pruvàllasi à radunà e truppe francese sbandate, decisì u marchese di Chauvelin di sbandunà a Casinca lascienduci capitulà una guarniglione di 75 omi.

Fù tandu ch’elli funu spupulati u Nebbiu è dinù a Marana mentre ch’elli èranu accampati à u Borgu, sottu cumandu di u culunellu francese De Ludre, una guarnigione d’un millaghju d’omi  {sultantu 500 sicondu certi ducumenti}  è qualchì cannone. Chauvelin ch’ùn duvìa tene tantu in pianta di manu i corsi ebbe ancu a sfacciatezza di chere un’armistiziu à Pàoli cù l’ùnicu scopu d’assettà i rinforzi, cunvintu ch’ellu era forse d’indirizzassi à di l’indigenti di cerbellu ! Cum’ella ci vulia à aspettàssila, Pàoli disse di nò.

U 5 d’uttobre 1768, i naziunali corsi inchjerchjonu u Borgu. U paese, stesu in tutta a larghezza d’un spìculu di muntagna, dumineghja a piaghja. In a so parte più inghjò per duve si ci accede naturalmente, una torra è qualchì casa si ci regenu l’ùnicu pozzu di u locu. À l’èpica, di u paese, De Ludre ne avia fattu un campu staccatu, postu in difesa è furtificatu à l’intuttu for d’u pozzu ch’ellu s’avìa smenticatu.

Ind’è a notte di u 6 à u 7 d’utobre 1768, i naziunali s’impatruninu di e case appicciate à a torra è francate da a furtificazione custringhjendu cusì u tenente à a resa : tandu a guarnigione francese si ritruvò staccata da l’accessu versu a piaghja è priva d’acqua. De Ludre era intrappulatu. Pasquale Pàoli in quantu à ellu stava in Lucciana cun un’impurtante corpu di riserva, vale à dì circa 4000 omi. Tandu Chauvelin chì tenia 1400 omi à a so dispusizione decise d’attraghje in aiutu à u culunellu De Ludre.

L’8 d’uttobre partinu da Bastia duie culonne di suldati francesi. Capitanata da Grandmaison, a prima frà d’elle assaltò eppuru in vanu i corsi chì assediavanu u Borgu da u nordeste. Pare senza in forse chì l’assaltu fussi un ingannu tàtticu ideatu da u marchese di Chauvelin per tarruscà u nèmicu vistu ch’in ssu mentre è sottu cumandu d’Arcambal a seconda culonna, cumposta di dece cumpagnie di granatieri, marchjava addirittura nant’à u Borgu induv’ella avvolse l’assediante ma fiascò à trafurà a lìnea nimica. Tandu i naziunali si ritrovanu in a gattiva pusitura di Jules César in Alesia, vole dì ‘accinti di fossi, palancati è altri medii di scacciu’ alzati intornu à elli à usu d’ùltimi muri trà e truppe di De Ludre è i rinforzi d’Arcambal ch’ùn ghjunghjianu micca à compie u cunghjunghjimentu frà d’elli.

U 9 d’uttobre, u marchese di Chauvelin ghjunse in carne è osse sopr’à locu affiancatu di truppe di rincalzu cù l’imperiosa brama di vince i corsi. Cavalchendusi à capu di i s’omi Pasquale Pàoli, pigliendu a so tacca, falò in a battaglia avvuciendu i naziunali corsi in ssa qualchì parolla :  » O Corsi patriotti ! State à ramintavvi i Vèsperi corsi di quellu ghjornu benedittu quandu in quissi i stessi lochi voi distrùssenu i francesi. Oghje più ca mai l’onore di a patria ma dinù a libertà pùblica anu bisognu di tutta a vaglia vostra. L’Auropa ci agguarda.  »

Di fronte à una frà l’armate migliore di u mondu cù l’armamentu mudernu, i naziunali corsi, frà i quali a maiò parte ùn eranu mancu appena suldati di mistieru, ùn avìanu per difendesi è assalì u nemicu ca e so pròprii schjoppi vechji smudati.

Eppuru perch’ella si trattava prima di tuttu di prutege a terra soia, azzizzati ch’elli èranu da u Babbu di so Pàtria, u ghjenerale Pàoli, èranu elli, i corsi, chì l’avianu più forte a scaravuglia per cumbatte. È a dice cusì Gregori : « è forse per lascià vede à u mondu sanu ch’ùn hè mai à vende alcunu pòpulu, è u pòpulu corsu ancu di menu ca l’altri. »

A battaglia perdurò dece ore. È Pommereul di cuntà :  » Si decise omu di caminà sottu u focu tremendu è cuntinuu chì n’escia {di e case} per sbundanne e porte à colpi di piola : à capu di granatieri si vidì à u sgiò di Narbonne à piola in manu attippassi a muntagna, poi intruducesi in u paese abbuchjendu e prime piulate : ma tutti sti sforzi funu quant’à purtà l’acqua à u mare postu chì e porte èranu tutte chjose à muru da dentru. Ci volse tandu à ogni costu à mòveci sottu u focu vivu è micidiale di e plutunate sparate da e case per tende a manu à u sgiò De Ludre chì acimentò indarnu parechji surtite per rallegà l’armata : ogni prova per franca quellu passaghju periculosu fece ciaba è vìa vìa s’accrescìanu l’ostàculi. È fù cusì chì d’un inciampu à l’altru sùbitu era per fà notte. »

In fatta fine cimbendu à a forza e truppe di Chauvelin arritronu è s’indibulinu. Fù tandu a scappascappa è l’armata francese fù ricundotta sin’à Bastia. In quellu mentre i suldati di De Ludre sempre inchjerchjati, ammanchendu di manghjusca è di munizioni, assitati ch’elli eranu è addisperendu di riceve qualsìasi aiutu capitulonu. U ghjenerale di Narbonne duvìa palisà più tardi : « Era a prima volta ch’eo vultava e spalle à u nemicu « . Marbeuf in quant’à ellu fù feritu à una spalla è u marchese di Chauvelin allèsitu à le spallette.

U bilanciu di a battaglia di u Borgu accusò d’una manera significativa a scunfitta francese : si cuntò omu 600 morti, 1000 feriti è 600 prighjuneri da a parte francese è un buttinu di 9 cannone è 700 fucili da a parte di i naziunali.

I prigiuneri funu trasferiti in Corti induve Pàoli cù a primura di rispittà e règule di a guerra lasciò i so furnimenti à i suldati è i so armi à l’ufficiali uspitendu quessi ancu in casa soia per fà cena !

Anch’ellu prigiuneru, u culunellu De Ludre, u nipote di Choiseul, fù trattatu cù i riguardi speziali è ancu autorizatu à cumparì à a corte di u Rè per risponde à l’accuse di Chauvelin purtate contru à ellu.

Dumouriez chì participò anch’ellu à tutte e guerre ingagiate in terra corsa nota inde so memorie : « I Corsi vìnsenu tuttu l’onore è a gloria di sta campagna avviata à a lighjera eppoi cundotta à a scimesca per compiesi à vituperiu. Tuttu ciò ch’ellu istigò Pasquale Pàoli era arditu, bellu bè almanaccatu è sopratuttu eseguitu cù astutezza è rigore. Durante sta guerra hà fattu ellu bella mostra di geniu è d’un caratteru forte forte. In quantu à i Corsi ci anu fattu prova d’una bravura stimèvule assai. »

 

Publicités
Catégories :Storia
%d blogueurs aiment cette page :